Zeisu Tangko Hawm 6 Na

Phone Tung Pan

 Lai tampipi na simzawh leh ut in utta kei lecin, na thu theihna hong khang ding hi. Utlo pipi in na khantohna hong ki behlap a suak hi. Tua ahih manin Thutheihna pen Laisimna panin tampi ki khangto hi. Thutheihna zong Pilna mah hi aa, tua Pilna pen a zongnuam khempeuhte adingin Phone tawntung panin tampi ki sim theita hi.

Video tung tawn panin Pilna, Khantohna tampi ki ngah theihta hi. Pilna sinnawnlo, Lai lah simngap nawnlo na hihleh Video panin Pilna, Khangtohna tampi ki sintheita hi. A Khangtho nuamte ading Paulap zon theih hun hinawnlo hi.

Leitung khangtohna khang semsem ahih manin, anhuan kawm, nau kepkawm, lupkawm na lengin Pilna tampi i sin theihna dingin Phone ki neihkim ciat ahih manin, Khantohna leh Pilna lam hanciam nopna aneihte adingin lam tampi omta hi. 

By-Editorial Laikung pan

Tomlakna: Pasian Khat Thu

Pasian: Ei Zokam in Pasian a khiatna "Pa", "thahat, vanglian". "Sian", "Siangtho," a deihna " siangtho leh a vanglian mahmah khat bek om hi cihna ahi hi.

Israel te upna: Abraham, Isaak, Jacob, Moses khang leh tuni dong Judaism te in Topa Pasian khat bek ahi hi ci in khauhtak in um uh hi. Trinity upna a nei LST Israel tangthu ah khat beek omlo hi.

Sawltakte upna: Sawltakte ih cih cih pen Israel minam sit mahmah te ahi uh hi, tua tangtawng Topa Pasian khat bek pen taksa pumpi ah hong suak in a min Jesu hi cih khauhtakin a umte ahi uh hi. Sawltak lo sungpan in Jesu sanggam te James leh Jude te in a up theih pakloh uh hangin a up khit uh ciangin, sanggam bek hilo in a sila ka hi hi kici uh hi (James 1:1; 2:19; Jude 1:1, 24-25).

Muslim te upna: Leitung ah biakna tawh kisai upna khauh penpen Muslim te in ko pen Abraham suan-le-khak diktak ka hi uh hi, Abraham upna ahi: "Topa Pasian in Topa khat bek ahi hi", amin Allah hi ci uh hi.

A tunga ih gente pen leitung tangthu paizia tawh ih genna hi a, tu in LST kammal te tawh ensuk khawm ni:

Khat bek bawl: Ama lim leh mel sun in Pasian in pasal a bawl hi (Pian.1:27). Pasian in khat bek bawl in amin Adam ci hi. Mihing khempeuh in "kei khat bek ka hi hi" cih a kiphawk sim in a bawl Pasian khat bek hi cih phawk tawntung ding ahi hi.

Thukham lianpen: Mihing a ki piansak khitzawh kum 2000 hun pawl (BC 1900 kim) in leitungah Pasian khat bek upna beisiang phialta in, Abraham bek in Topa khat bek upna na kemlai hi.

 

Abraham suan-le-khak te bek in Pasian khat upna leitungah a khaici kemte hongsuak in, laidal tawh ciaptehna om nailo hi. Pasian mahmah in leitungah a mangthang ngeilo dingin ama khut mahmah tawh gelh a, Topa Pasian in Topa khat bek ahi hi cih thu laikung tawh gelh in amasa penpen Pasian kammal hong suak hi. Israel minam in tua pen mangngilh ngeilo dingin Pasian in gen phapha in, na tate uh na hilh suksuk ding uh hi ci hi (Thkn.6:4-9). Tua a kimutheilo Pasian khat bek pen mihing taksa ah hong suak in sila lim la hi, a gen bulpi ah thukham a lian pen in Topa Pasian in Topa khat bek ahi hi cih thu mah hong bulphuh hi (Mk.12: 29). Sawltakte in zong Topa Pasian in Jesu ahihna thu gen in Pasian nih, thum ka neita uh hi cih khat vei beek gen ngeilo uh hi.

By.Zion Tangko Hawm 2 Na panin a ki la ahihi.

Website: https://zionzomimedia.blogspot.com